Абласны конкурс харавога мастацтва імя Заслужанага дзеяча мастацтваў БССР Т.К.Лапацінай

Хор – як вялікая сям’я, дзе кожны, валодаючы сваім унікальным голасам, укладвае часцінку ў стварэнне агульнай гармоніі. Хор стварае чароўную музыку, імя якой – песня.

Менавіта любоў да народнай песні і прыродны музычны талент дапамаглі Таццяне Карнееўне Лапацінай, ураджэнцы вёскі Азершчына Рэчыцкага раёна, з невялікага сямейнага ансамбля стварыць яркі харавы калектыў, які пакарыў сваімі ўнікальнымі спевамі шматлікіх слухачоў Гомельскай вобласці, г.г. Мінска і Масквы. Менавіта ў гонар Т.К. Лапацінай заснаваны абласны конкурс харавога мастацтва.

Дадзенае мерапрыемства праводзіцца з 1991 года і стала ўжо традыцыйным, у ім удзельнічаюць харавыя калектывы вобласці з найменнем «народны аматарскі калектыў» з народнай манерай выканання незалежна ад ведамаснай прыналежнасці.

Арганізатары конкурсу – галоўнае ўпраўленне ідэалагічнай работы, культуры і па справах моладзі Гомельскага аблвыканкама і ўстанова «Гомельскі абласны цэнтр народнай творчасці».

Мэты конкурсу – захаванне нацыянальнага харавога мастацтва, павышэнне выканаўчага майстэрства аматарскіх харавых калектываў, узбагачэнне рэпертуару лепшымі ўзорамі беларускага песеннага мастацтва і апрацоўкамі рэгіянальнага песеннага матэрыялу.

Праводзіцца 1 раз у тры гады.

У рэпертуары ўдзельнікаў конкурсу дамінуюць беларускія, украінскія, рускія народныя песні, сучасныя творы беларускіх аўтараў.