30 лістапада ў выставачнай зале Гомельскага абласнога цэнтра народнай творчасці распачала работу інтэрактыўная выстава «Спеўная спадчына Гомельшчыны», падрыхтаваная пры падтрымцы гранта Прэзідэнта Рэспублікі Беларусь.
Лакальныя спеўныя традыцыі Гомельскай вобласці на выставе паказаны праз абрадавыя традыцыі – Каляды, гуканне вясны, Юраўскі карагод, ваджэнне і пахаванне стралы, провады русалкі, жніво і вяселле. Напаўняюць экспазіцыю тэксты абрадавых песень, сучасныя рэканструкцыі традыцыйных строяў, прадметы абрадавай культуры і традыцыйнага побыту. Таксама прадстаўлены выданні Гомельскага абласнога цэнтра народнай творчасці па традыцыйнай культуры. Праз размешчаныя ў экспазіцыі спасылкі (qr-коды) можна паглядзець відэа- і аўдыязапісы аўтэнтычных і аматарскіх фальклорных калектываў рэгіёна, якія размешчаны ў раздзелах сайта ўстановы, прысвечаных нематэрыяльнай культурнай спадчыне і фальклорным калектывам Гомельшчыны.
Жывым спеўным аздабленнем адкрыццё выставы суправаджаў фальклорны ансамбль Сярэдняй школы № 30 г. Гомеля.
Тэкст: І.В. Глушэц.
Фота: В.А. Драздова.
