Гомельскі абласны цэнтр народнай творчасці ўпершыню правёў абласны конкурс на лепшую пастаноўку работы па развіццю традыцыйных рамёстваў «Ад спадчыны да сучаснасці».
Асноўныя мэты конкурсу – выяўленне, захаванне, развіццё і трансляцыя нацыянальных традыцый творчасці, паглыбленне ведаў гістарычных асаблівасцей рамеснай творчасці рэгіёнаў Гомельскай вобласці, падтрымка і заахвочванне майстроў, якія займаюцца развіццём і ўвядзеннем традыцыйных рамёстваў у сучаснае жыццё.
Крытэрыямі ацэнкі работы ўстаноў культуры сталі асноўныя паказчыкі дзейнасці ўстаноў культуры раёна за 2020-2021 гг. і першы квартал 2022 г.; адпаведнасць напрамкаў дзейнасці традыцыям рэгіёна; разнастайнасць формаў працы для прыцягнення розных груп насельніцтва да заняткаў рамёствамі; арыгінальнасць і навізна формаў папулярызацыі традыцый рэгіёну; трансляцыя традыцыйнай народнай культуры праз выданні, сродкі масавай інфармацыі, інтэрнэт рэсурсы (наяўнасць сайта, старонкі ў сацыяльных сетках); удзел у рэспубліканскіх, рэгіянальных, абласных конкурсах і мерапрыемствах.
У конкурсе прынялі ўдзел 18 устаноў культуры Гомельскай вобласці, якія займаюцца актыўным развіццём аўтэнтычных рамёстваў беларусаў.
У рамках абласнога конкурсу была ўведзена намінацыя «Новае жыццё рамяства», якая прадугледжвае майстар-клас па вырабе і выставу вырабаў адроджанага рамяства. У дадзенай намінацыі ўдзельнічалі 7 устаноў культуры рэгіёну.
Журы вызначыла пераможцаў. Назвы лепшых устаноў культуры будуць названы 4 верасня ў межах XXIX Дня беларускага пісьменства, які ў гэтым годзе будзе праходзіць у Добрушы. Запрашаем на свята, дзе ўсе жадаючыя могуць пазнаёміцца з выставай традыцыйных рамёстваў «Ад спадчыны да сучаснасці»!
Фота з архіва Гомельскага абласнога цэнтра народнай творчасці.
